昨日放工響應運輸署一姐的呼籲，收工之後叫同事去happy hour，有同事問，近日我有一篇貼文引起社會討論，就是我話三隧新收費有效，塞車情況有所改善，但我用十點半紅隧港島入口的情況來判斷，大家似乎唔贊同，有人話點解唔在半夜兩點，一定冇塞車，而十點半已經過了繁忙時間，
大多數都唔塞車，究竟點解要用十點半。
我話各位同事如果在早上約了客在九龍，在出發之前，大多數會從公司望吓隧道入口塞唔塞車，如果塞車，就會早些少出發，在早上十點半是一個比較關鍵時間，有時塞，有時唔塞，其他時間大多數塞到飛起，睇唔睇都是一樣，換句話說，如果十點半唔塞車，代表新收費有效，如果塞車，運輸署又要諗計，不過，運輸署班人好似未打先輸，都未睇真情況就話新收費沒有顯著功效，塞車情況沒有改善。
我問各位同事，大家對住個維多利亞港，可唔可以睇到潮漲潮退，一定唔可以，即是在早上或者放工時繁忙時間，無論在新收費之前或者之後，三條隧道都很塞車，咁樣如何判斷新收費是否有效，但在十點半就唔同，如果唔塞車就代表新收費有效，情況好似去了淺水灣，潮漲潮退很容易睇到。
有同事在happy hour飲多了，唔可以揸車返屋企，我叫司機車所有同事回家，否則隨時可以被控醉駕，其實大家都唔明白，一姐點解叫人放工去happy hour，避開繁忙時間，難道一姐唔知道去happy hour是飲酒，不是飲果汁。
