自己打穿自己糊篤的代價

　　我以前打麻雀有一個習慣，就是上家出銃我不會食糊，因為我怕跟著自摸，即是打穿自己糊篤，雖然亦有錢收，但兩者相差六倍，現在我已經唔打麻雀。

　　有一晚同幾個老友在一個地舖食肆食飯，其中一個老友悶悶不樂，原來二十幾年前曾經買入那個舖位，在落了樓價5%訂金之後，唔夠一日立刻有人接貨，仲畀10%佢賺，物業代理話買一賠三，好過去搶，新買家買入之後租了比人，現在舖位升值冇十倍都有八倍，所以老友悶悶不樂。

　　這些事在物業投資界經常都會發生，這叫做自己打穿自己戶篤，我自己都試過唔知幾多次，但想深一層，如果不是好嘢，點解咁快會有人畀錢我賺，所以，以後當我遇上同樣的事情時，我都會細心考慮，畢竟打穿自己戶篤是不開心的事，雖然是有錢賺，但是就會差很遠。

　　有人認為，有糊唔食，罪大惡極，有錢都唔賺對唔住財神，賺了錢有機會可以再買返，這個策略在股票投資還可以實行，在物業投資就要認真考慮，畢竟遇上優質物業的機會不是太多，一般業主若非迫不得已，都不會出售手上最優質的單位，雖然話賺了錢可以第二日買返，不過就唔知等到幾時，最後買回一個比以前買走差很遠的物業，最後令到自己蝕本，這就是自己打穿自己戶篤的代價。