星期六晚與幾個老友食飯，去到一間相熟餐廳，以為星期六一定會很爆，但出乎意料之外，餐廳只得七、八成客人，唔使訂位都可以立刻就座，最奇怪就是老闆對於生意少了竟然不以為意，仲談笑風生，老闆話，近日自由行的客人多到做唔切，伙記都做得很辛苦，生意少了咪抖下，至於點解生意會減少，就是同區開了一間新食肆，有很多優惠，吸引了區內很多人去幫襯，區內所有食肆都受到影響，但只是暫時性的，隔幾日熟客就會返轉頭，急也沒有用。
有外資銀行見到香港樓宇成交量減少，成交價亦下跌，立刻表示今年香港樓市會倒插，將第一季7%升幅嘔返出嚟，但外資銀行好似睇唔到
新樓成交量不俗，不但超額認購，而且仲可以賣個滿堂紅，新樓熱賣，自不然會吸納了不少購買力，二手樓就會冷清，這是正常現象，不能夠見二手樓成交量不足就斷定樓價會下跌，當地產商停止開盤，購買力又會返回二手樓市場，我並不是說樓市今年不會將第一季7%升幅蒸發，而是要睇全面性一些，新樓吸納了二手樓購買力，在承托力不足之下，二手樓樓價下跌是很正常的。
由於二手樓在第一季作出7%反彈，令到去年第四季賣了樓的人懊侮不已，由於經過急速反彈，即使外資話樓價下跌，賣樓的人亦不會太多，擔心在賣樓之下再嚟一次反彈，咁樣就後悔莫及，老實說，有迫切性需要賣樓的人亦早已賣樓，剩低有資格賣樓的業主不是很多，就算他們要賣樓，要價亦非常硬淨，結果是成交量會繼續低迷，但樓價就唔會大跌，過份擔心有機會做錯決，不一定是賣錯樓，而是見到筍盤都唔敢買。
