滙豐昨日表決分拆之前，已經有不少人問我投拆抑或唔拆，我話未有決定，甚至
投唔投都未有決定，不過，暫時傾向保持現狀，但亦接受分拆。有老友話我走精面，答完等於冇答，我話想唔走精面都唔得，如果畀一個肯定答案，尤其是滙豐，我擔心事情成真之後，但效果不佳，滙豐股價大冧，有人找我晦氣，所以，我非常佩服那位搞分拆的小股東，因為分拆之後，滙豐股價升跌難料，升當然是好，但如果大跌，我相信他很麻煩。
有人話滙豐在分拆之後，股價一定大升，因為將潛在價值發揮出來，我認為只是機會大一些，因為有不少持有大量股票的股東，在滙豐分拆之後反而覺得失去興趣，而將股票賣走，股價不升反跌，所以，分拆亦有極大危險。
至於我點解傾向於保持現狀，因為滙豐現在有著投資股票的三大最好因素，就是賺錢、派息、回購，尤其是回購，以往滙豐股東可以攞新股取代股息，其實是搵自己老襯，新股不斷增加，股票價值不斷減少，回購就正好相反，股票數量減少，股值自然上升，更何況現在滙豐管理層答應將一半盈利派息及在適當時候進行回購，有這樣的保證，又點解要將滙豐分拆。
不過，昨日不分拆亦不代表以後不分拆，倘若日後滙豐在歐洲方面表現不佳，或者食言不派息不回購，到時候才再表決滙豐是否應該分拆還未遲，要急都不需要急在一時。
