近日代理以賣慘的方法賣樓，仲配埋歌詞，做法的確很新穎，不過效果就見人見智，我個人認為，大多數買家都
唔會有興趣買那些講得好慘樓盤，因為想壓價都唔可以，擔心代理會話，買家已經很慘，仲要壓價，究竟有冇人性，最好方法就是話冇興趣，悲慘賣樓，可能適得其反。
對很多人來說，買樓是人生重要決定之一，所以，一定要搵一個適合自己單位，當然有不少人太過仔細，遲遲未能夠做決定，錯過了不少買樓良機，但即使如此，亦不能草率行事，買樓亦是買入一大筆債項，如果物業不適合自己，不但終身後悔，而且沒有翻身機會，若果因別人賣慘而買樓，嚴格來說，不是自己做決定，而是業主替買家做決定，不知道是福是禍，就算福，都是阿福的福。
買賣慘的樓，價錢反而唔成問題，就算買得貴，如果單位冇問題，最多日後賺少一些，但如果單位有不可告人往事，到再賣樓的時候，就會發覺根本賣唔出，到時輪到自己賣慘。
現在市況雖然稍靜，但不是沒有成交，稍為好的單位亦不難賣走，那些賣慘的單位大數是非常低層，方向不佳，買入之後就要有準備住到天荒地老，買樓有一個秘訣，就算遇到不適合單位，不要浪費時間去討價還價，萬一業主願意割愛，變成自己坐艇，但遇上適合單位，就要毫不猶疑，否則，隨時蘇州過後冇艇搭。
