在星期三晚，雖然是8號風球，但不少私房菜仍然有做生意。有錢佬來電話一齊食飯，有靚女請客，唔使佢俾錢，原來有錢佬曾經對其他人講打算出高價照顧那位靚女，但是那位靚女唔答應，最後有人出更高價錢照顧那位靚女，於是請有錢佬食飯，順便請埋我，靚女心中明白，若非有錢佬點石成金，她根本唔值這個價錢。
靚女問食Omakase好唔好，最近經常同照顧她的人去食，覺得唔錯，有錢佬還未回答，我已經話唔好，靚女可能唔
知道，大多數有錢佬唔鍾食Omakase，他們會認為這是暴發戶的餐單，唔識得叫餸的人才食Omakase，任由廚師揸主意，收得貴唔在講，隨時是那些賣唔出的食材，唔收貨又唔得，鬼叫你由廚師發辦。有錢佬話我知佢心意，我話做擦鞋仔做得耐，有多少心得。
靚女原來是有目的而來，她介紹一件古董表給有錢佬，講到天花龍鳳，並且話俱收藏價值，有錢佬話考慮一下，稍後私下同我講對那隻古董表冇興趣，具收藏價值即是唔係咁容易賣走，如果有大減價的勞力士，他是有興趣。
靚女不明白，介紹有錢佬買嘢，首先要了解他們喜歡什麼，不是靚女自己喜歡什麼，如果介紹自己喜歡的物品給有錢佬，與Omakase有什麼分別，成事的機會不高，並不是所介紹的物品唔好，而是有錢佬唔鍾意食Omakase。
