有一個朋友請我食飯，但是他遲到，伙記知道不是我埋單，根本唔多理我，就算想叫碟小食，經理都話等埋我朋友到來，他已經點好菜。我見到咁既情況，唯有飲杯茶，滑下手機。
朋友到來之後，立刻上菜，是四和菜加一個例湯，本來食什麼也沒有所謂，但咁隆而重之請我食飯，應該食得好一些，朋友睇到我面口唔多好，笑住話近日減肥，食清淡一些，但大家都知道，朋友很鍾意一個人食飯，而且食得相當好，請人食飯則是普普通通，而且不會徵詢客人意思。
朋友問我，他有冇有錢佬風範，因為有人同佢講，約人一定要遲到，最低限度半粒鐘，否則被人誤會是下門親家，而請人食飯一定要由佢寫餸，而且菜式不要名貴，否則有擦鞋之嫌，而自己一個人食飯，就要坐大廳，食名貴菜式。老實說，我真的唔識答，唯有話他的朋友說得對，其實是害死佢。
朋友可能唔知道，從來只有欠人錢的人才會遲到，問人借錢的時候當然不會，朋友遲到以為自己是非常有架子，但其他人可能有不同想法，以為他欠錢才會遲到，因為債主不敢發火，否則就唔會還錢。
我由小至大，由人教我到我教人，都會話闊佬別人，孤寒自己，請人食飯就要最好，自己普普通通就可以，尤其是一個人食飯的時候。我不少有錢朋友，當他們一個人食晚飯，通常都只叫一個普通套餐，唔會有鮑蔘翅肚，請客當然是不同，除了菜式名貴之外，仲會問客人喜歡食什麼。
朋友問怎樣才算是一位有錢佬，就算世界首富馬斯克都唔係，馬斯克彈弓手，話買曼聯最後又唔買。老友可能不明白，馬斯克的確是有錢佬，他能夠點石成金，他雖然沒有買曼聯，但立刻有三位人士出更高價。如果馬斯克不是有錢佬，不能夠點石成金，邊度會有人出價買當時在英超排包尾的曼聯。
