在我細個的時候，阿嫲每日早上都會去後花園執雞蛋，佢會
對住某隻雞話，如果唔生蛋，就會劏咗佢。後來我知道，阿嫲會摸下雞屁股，感覺到硬硬地就會話唔生蛋就會劏，又很奇怪，那些母雞好似識聽阿嫲講說話，唔使幾耐就會生蛋。
阿嫲久唔久就會劏一隻母雞做晚飯，理由是那隻母雞唔生蛋，劏咗佢無謂與其他母雞爭食。有時很久都唔見阿嫲劏雞，我會問吓佢，阿嫲話，所有母雞都生蛋，點解要劏，生緊蛋的母雞是不可以劏的。
近日有不少業主賣樓，令到樓市向下調整，業主賣樓的理由不但五花八門，而且仲有潮流，在英國推行BNO移英計劃之後，不少人會話賣樓移民，這個理由很實在，移民唔賣樓，即是移居不移心，唔使幾耐就會返香港。
在美聯儲局開始加息之後，有業主話擔心加息而賣樓，我本來認為這個理由有多少牽強，唔通移民去了英國之後唔買樓，英國的利息比香港高很多，他們點解唔擔心，後來有移了民去英國的人話比我知，英國除了倫敦之外，其他地方的樓價很低，如果賣咗香港層樓，只要唔在倫敦買樓，在其他城市買，full paid 都冇問題。
最近的潮流是有收租業主話睇淡樓市，所以賣樓，我覺得那些業主是否當買家是老襯，就算有人打算買樓都唔會向那些業主買，否則樓市如賣樓業主所料大跌，就會畀人笑到面黃。買樓最好是幫到業主，又可以解決自己需要，同業主對賭就唔好。
據我了解，業主將收緊租的物業賣走大多數是因為財困，不過他們為了面子唔會講真說話，只會話睇淡後市而賣樓。點解我會知道，我阿嫲話，生緊蛋的母雞是不會劏的。
