有人問我點解在報紙撰文講投資地產，仲咁蠢將自己經驗心得講出嚟，我話有苦衷，其實我都唔想寫，但如果唔寫，就會面對一個問題，不時會有人問我是否應該買樓，那些人可能是口痕，或者已經做了決定，我講乜他們都是買或者唔賣，在我方面，如果話唔買，而他們又的確冇買，到樓價升了之後就會怪我，反之他們因為我的提議而買樓，即使樓價上升，那人有可能話供樓太辛苦而問我借錢，這個情況亦唔係未試過，所以我在報紙撰文，如果有人問我是否應該
買樓，我就會話已經將心得寫了出來，有空的話買份報紙睇吓，咁樣我就唔使負責任，老實說，別人的事，關我差事，買樓咁大件事梗係自己決定自己負責。
不過，很多人都喜歡多管閑事，我有一個老友因為睇好樓市而叫其他朋友買樓，甚至借埋錢給他們，但很不幸樓價下跌，他不但不能收回借出去的錢，甚至要再要借錢給他的朋友供樓，搞到自己財困，到那時候他才明白我講別人的事，關我差事的意思。
有人同我講，毫無疑問，美國是世界上超級大國，但點解通脹去到8.6％，媲美南美洲甚至第三世界國家，老實說，答案很簡單，就是美國太喜歡多管閑事，太過關心其他國家的事，又幫助他們成立新政府，甚至在不少國家設立軍事基地，大大小小超過800個，又有11支航空母艦艦隊，軍費龐大可想而知，太過關心其他國家的事，反而無暇兼顧自己的事，除了通脹率去到8.6％之外，國內基建亦落後於不少國家，最大件事就是欠下一大筆國債，唔知點樣清還，唯有繼續發債冚債，老實說，欠債的人不會被人尊重，美國總統其中一個任務是說服其他國家買債，大多數國家都唔會托手踭，不過，那些國家有一個簡單要求，就是美國唔好再理他們的國事。其實，對美國來說亦是好事，代表那些國家已經成長，可以獨立處理自己國事，不用美國費心費銀。
