餉物業估價署私宅售價指數又創新高，上年升15%，比2016年升幅高出九成。
2016年上半年曾經樓價回調，下半年又再向上回升。2017年樓價直情未停過，同股市一樣由頭升到尾。股市你睇淡，叫人唔好買，最多令人賺少啲，唔會令人生活質素下降，至多無法提升；但去年年頭叫人唔好買樓，升足一年，人工沒有升15%，代表購買力下降咗，可以買嘅呎數又少咗。計埋租金升幅，叫人唔好買樓嘅係令人生活質素下降。所以，自覺說話有份量嘅人，標準答案一定係，量力而為，自住就買，投資則免。咁講法雖然行貨，卻是實情，唔會害到人。
至於說話沒有份量嘅，唔怕害到人嘅，梗係講有錢就買樓，唔自住都攞嚟投資，畀首期等人幫你供。你唔見全部有錢人都走出嚟講話睇唔到樓價有機會跌咩？佢哋大部分人都係發展商，係賣樓嗰個。只要佢哋唔想樓價跌，以現時由佢哋主導市場，樓價就係唔會跌。唔跌，代表大把人繼續無法上車，要租樓住。咁即係話，大量人口可以幫你供樓。你見熱門屋苑長期缺盤，甩皮甩骨嘅都唔會平租畀你，唔係個個買得起樓，但個個都要有瓦遮頭。只有豪宅先會出現丟空冇人住嘅情況，因為業主唔會平租，有能力嘅租客又大把選擇，兩者嘅差距係好難拉近。所以中價細價樓咁多人搶，呎價貴過豪宅，正是自住同投資嘅都一齊搶盤。
另外樓價唔會大跌嘅原因，係因為錢多，而錢多嘅最有力證據，就係連財仔都要降低利息。財仔最喜歡做物業按揭，你睇電視廣告就知。而家財仔借錢，可以跌穿10厘，代表財仔都要爭生意，唔能夠再用財仔息口借貸。如果錢少債仔多，財仔會唔會收平息？一直話息口上升，但財仔嘅息口都下調，究竟係學者分析睇得準，還是市場地產資訊唔會呃人？
