安達臣地皮呎價是12000蚊一呎，留意入標嘅公司數量係破紀錄，大家都想搶呢塊地；
中標嘅並非最活躍、最大嘅地產商，表示任何發展商要攞地，就要出一個進取價錢，否則就會好似新地(0016)失落咗長沙灣興華街幅地一樣，計錯數，搞到自己幢酒店孤零零。
而家唔止市民買樓要用進取價，發展商攞地都一樣要進取價。以風險嚟講，發展商唔低過升斗市民，唔夠實力嘅發展商，買貴地嘅後果，仲慘過邊緣市民借到盡勉強上車，你睇海航？而家樓價不停上升，發展商買貴地，市民買貴樓。咁多貴麵粉响貨倉，發展商都唔敢賣平麵包。一日政府唔撤辣招，一日樓市都係由發展商一手主導。由發展商主導嘅樓市，係唔會跌。未來你會一面見樓價創新高，一面見到唔少銀主盤，正如呢邊高價投到安達臣地皮，另一邊啟德差唔多出現銀主地一樣。
近兩年世界發展係突破性，突然間令人彷彿生存在另一個星球。資產價格直線上升、人工智能、加密貨幣，你可以感覺到，未來世界會完全唔同。有兩套紀錄片，一套叫Banking on Bitcoin，另一套係AlphaGo。
贏大錢靠信念 增勝算惟進取
Bitcoin紀錄片唔止係找尋中本聰，仲講咗Bitcoin發展途中，幾多人因為行得太前太快，而家要坐監。你覺得Bitcoin由高位跌五成好驚？但係Bitcoin之前試過跌七成；你而家入市買Bitcoin未算最夠膽，3年前夠膽買Bitcoin嘅，佢哋真係買嘅未知前途嘅空氣。唔好忘記，3年前就係拉咗兩個Bitcoin foundation主持人嘅時候。當時美國政府嘅打壓，比而家南韓政府高出不知幾多倍。而家南韓人係主要買家？3年前美國人幾乎係唯一買家。而家加密貨幣跌價，對相信這玩意嘅人，濕濕碎。投資同投機，贏大錢嘅永遠係有信念嘅人，仲要係堅定嗰一隻，知道自己買乜嘢。
AlphaGo更加係絕頂例子，當年李世乭係可以贏到人工智能，因為AlphaGo有弱點；而家罩門封上，人類再冇機會。未來人工智能會搶去好多人類機會，你要保持自己嘅勝算，就係要同投地一樣，進取。
