據調查顯示，香港樓價之貴，上年要18年不吃不喝才可上車，今年已經要19.4年，樓價高處未算高。這個用薪金中位數同樓價比較嘅把戲，只可以用嚟做宣傳，貪soundbite夠響，認真對待你就死得。薪金中位數，你認為一半打工仔嘅人工應該係可以足夠輕鬆供樓？全世界嘅工資都係停滯不前，香港失業率可以創新低係異數，其他發達國家尤其是係年輕人都係冇嘢做。用工資去買大城市嘅樓，唔止係香港，
其他大城市已經係趕絕新一代，令佢哋大部分都難以擁有房地產。
紐西蘭直情想限制外國人買樓，因為本地人買唔起樓，甚至有人要瞓街。用人工嚟買樓，連首富都買唔起，因為佢攞嘅人工超低。大把人唔係靠出糧生活，呢啲能夠買樓當食生菜嘅人，正正係樓市嘅中流砥柱。唔使等下年調查報告，我敢肯定，下年你要21年不吃不喝先買到樓，首次有城市突破20年。
我早前寫過，香港唔係最難買樓。如果用薪金中位數去計，北京上海更加難，要40年不吃不喝先得。不過調查唔包括內地城市，先讓咗個冠軍寶座俾香港。但係你唔見北京上海樓價跌，政府操控咁厲害，禁買禁賣都出埋，都唔可以令樓市下跌，證明當人類唔相信銀紙，能夠保存財富嘅，最有效永遠係磚頭，中國人思想尤甚。
你要記住，樓價最難負擔嘅城市，通常係最多人想生活、最搵到錢嘅城市。排名香港之後嘅，有悉尼、矽谷一帶呢類城市。全部係生活一流，或者財富增長最快嘅地方。市場唔會呃人，樓價咁貴，呢啲城市都無話人口遷離，市民大逃亡，反而愈多人想住，愈多人想置業。又唔見大量人口遷往樓價甚平嘅喀布爾？樓價愈貴都咁多人湧入，梗有其原因，後果係樓價會更貴。
史上出現樓價一沉不起嘅，只有日本，得呢個國家，樓市泡沫爆破後繼續長期沉淪，讓香港人咁多機會走去買樓，變身民宿出租。原因係大部分日本人都係甘於打工，每月出糧。你睇吓日本地鐵站，那種營營役役嘅氣氛，全世界少見。用薪金中位數走去買樓，結果就係年輕人走向極簡主義同無慾無求，反正一世都唔使旨意，不如將自己生活要求降低，咁就生活得寫意。香港千祈唔好望份人工夠你買樓，要先諗如何唔買樓去令你未來可以買樓，等於前輩話齋，望自己發達都唔好望樓價跌。
