有建議市民可以提取強積金結餘去做首置嘅首期，無論你有冇打算買樓，你都應該舉腳贊成。強積金逼每個市民供養基金公司，但係佢哋收取昂貴管理費，表現並唔好過收費特平嘅ETF。
基金經理開始成為夕陽行業，將來唔係由人工智能揀股，就係索性買晒ETF跟市場同步。買追蹤指數ETF嘅好處，就係指數公司幫你揀股。汰弱留強嘅指數，確保你買嘅追蹤指數基金，一定係買啲當紅股票。雖然，未必可以識於微時，在未爆發前就買入股票，好似南非Naspers買中騰訊（700），咁就母憑子貴。但係ETF幾乎係立於不敗之地，連ETF都輸，市場好難搵到人贏。簡單講，強積金係蠶食你財富嘅隱形殺手。
樓價唔升 至少賺住
用強積金買樓，過去10年嘅比較，回報一定比你放在任何強積金投資組合高。哪怕你選擇進取形組合，你有乜可能跑贏有槓桿嘅樓市？就算基金經理神機妙算睇中騰訊，佢受mandate所限，都唔可以一注獨贏。唔借得又唔可以將雞蛋放晒一個籃，冇一個基金可以幫你賺到盡。反而買樓，就算10年後原地踏步冇得升，你都賺咗住，交少10年租。用強積金買樓，香港人未諗賺，至少輸少啲。
只係強積金可以用於首置會有後遺症。基金公司唔少人要失業，夕陽行業加快走入夕陽；政府可能乘機加供款額，要打工仔更少錢使，成世為層樓打工；中小企被迫增加供款，惟有叫員工化身自僱人士，到時候香港遍地初創企業。