最理想嘅理由，當然係本欄有影響力，所以閱文（00772）同雷蛇（01337）在上市首日有不同嘅股價表現；次一級嘅理想理由，怕且係本欄同一眾有貨嘅人都人同此心，所以說法大致與市況同步；但真實同殘酷嘅理由，可能只係巧合。姑勿論邊個理由，雷蛇同閱文係唔同級數，股價表現反映咗。
對於同時有用大約銀碼入飛抽兩隻股票嘅投資者，最佳嘅策略，就係用羊毛出自豬身上嘅方法，沽雷蛇揸閱文，咁你手上閱文嘅貨應該係零成本，坐幾耐都得。
早前提到有樓市分析員講得出樓價會跌嘅理由，佢仲有一個理由我講漏咗，就係佢話美元會升。美元升，港紙都要升，咁港元資產好易會跌，否則港元升港元資產又升，以非美元計，香港資產咪好貴？咁冇理由世界上有自由市場嘅資產可以比其他市場超前太多而沒有沽壓，大致上理由應該如此。
不過，貨幣作為一種資產類別，佢嘅價值除咗同其他資產比較，亦同其他貨幣對手比較；一隻貨幣平定貴，好難用一個數字定奪。美元兌日圓升值，兌人民幣可以貶值，兌美股又貶值，咁你話美元係升咗定跌咗？
港元跟美元升值，咁港元兌其他資產類別又是否一定升值？港元可以換多啲外幣，是否表示少啲港元一定可以換同一層樓？
如果港元供應太多，雖則兌換其他貨幣有着數，但是否等於換層樓返嚟同樣着數？
分析員讀書太多，認識世界流於理論化，但係世界比理論行得更前，結論係好多分析同市況脫節。例如環球股市大升，冇人可以解釋到。香港樓市升完又升，拋幾多加息預期恐嚇論都無助減低恐慌性買樓，到最後用不理性去解釋一件要好理性才會夠膽做嘅事情，以致無人可以信服。
都係嗰句，要學讓思考不理性為理性，你至會贏。
