新盤開售萬人空巷，有人將情況同九七相比。其實唔好話香港，成個世界同20年前都唔同晒。任何人用20年前嘅歷史嚟分析今日嘅世界，輸鬼死你。遠嘅唔使講，6年前樓價指數升穿九七高位嘅時候，傳媒已經攞九七年嚟比較。結果係，仲有九七餘悸嘅人，錯失了6年至少50%嘅升幅。6年前都已經唔可以用九七嚟比較，點解6年後嘅今日可以？
唔係九七嘅歷史重演，唔代表而家一定好過九七。九七年仲係一個可以靠打工向上爬嘅年代，只要你有份好工或者一門專業，只要你畀心機做，搵份人工穩定兼且逐步上升嘅工作係有可能，你可以捱吓捱吓捱到層樓番嚟。
無錯，1997至2003年係會有人失業，有幾個月冇嘢做，甚至要轉行。但係嗰6年係有盡頭，生活點苦都會見到盡頭。
但係2017年，香港人發覺靠打份工嚟提升甚至維持生活都唔容易。你睇國泰（00293）員工，你睇滙豐銀行，你睇吓中環投行，有幾多無甚過錯嘅香港人冇咗份工。我特別強調係香港人，因為就算公司唔係裁員，好多時候香港人嘅工作崗位係俾其他人種代替咗。2017年，香港人唔可以靠打工嚟改善生活，我覺得好恐怖，唔知點解冇人覺得係一回事。
正因為唔可以靠打份工嚟改善生活，而家仲用入息中位數去表示樓價同市民購買力脫節係白癡。香港基本上有一半家庭係必定買唔起私樓，要靠助公營房屋。
望發達都唔好望樓價跌
但另一半家庭有本事買一個或以上嘅私人單位，咁成個樓市就已經俾佢哋買起晒。用人工嚟衡量購買力，唔好忘記，首富都好似仲係出緊5000蚊糧，近乎免費幫股東打工。以佢咁低微嘅人工，
樓價係咪同佢嘅購買力脫節？就算唔講首富，响中環有大把人，佢哋嘅人工低到可恥嘅水平，但副身家厚到令你感覺你份薪水先至係可恥。佢哋買樓，千方百計令自己可以通過銀行壓力測試，但其實一炮過full pay都冇問題。呢類跌入買唔起樓嘅人，先係最有錢買樓。
九七年用人工嚟買樓，2017年用資產增值再去買樓，兩者完全唔同。九七年真係驚冇咗份工，2017年就怕資產全面跌價，火燒連環船。
即係話，九七年邊個冇咗份工邊個就唔掂， 2017年邊個地區資產大冧價，就成個地區一鑊熟。你望香港樓價跌等你可以上車？前輩話望自己發達都唔好望樓價跌，呢句說話今日更加應棍；香港樓價跌嘅話，你會發現自己活得慘過買唔到樓。
