2006年MotoGP冠軍希頓，踩單車時遇上意外同對頭車相撞，深切治療幾日後傷重死亡。諷刺嘅係，佢响賽車場揸電單車高速片彎冇事，反而响意大利海邊揸住架單車就炒車玩完。呢個世界永遠係，你有晒準備，就算身入險境都可以全身而退；反而環境輕鬆，你唔為意嘅情況下，每每就係呢啲掉以輕心攞你命。
家陣嘅股市樓市就好似賽車場同意大利海邊。樓市個個金睛火眼，日日驚佢爆，政府每日都度橋點樣撳住樓價，潛在買家日日刨定報紙，睇吓幾時有新盤甚至有筍盤；股市就個個响海邊踩住單車，任由騰訊（00700）日日創新高，大市都未識幾時停，你今年任何時間沽空都要輸。照理論，日日都諗住會爆嘅樓市就好難爆，反而個個睇好嘅股市就危危乎。
大行話要睇淡地產股，話金管局辣招會減慢售樓速度，影響盈利。查實股市幾時都唔識準確看待地產股，所以本地地產商股價有資產折讓，股票含金量極高。
香港嘅地產商係最幸福嘅一群，玩嘅係近乎獨市嘅資本轉換遊戲，技術含量唔高；只要唔心急，有耐性，保證你贏。到今時今日，政府仲係逼本地地產商發達，想窮都難。太耐歷史嘅唔好多講，就講今年。今年所有嘅辣招，包括幾日前金管局降低按揭成數，都係逼人買一手樓，因為二手唔止供應少，財務支援更少。而家有財力嘅人基本上一早就有樓，未有樓而又想買樓嘅，都係欠缺財力嘅一群。與其成日話釋放購買力，倒不如話釋放意志力，令唔想或唔敢買樓嘅人，終於意志崩潰，加入負債買樓嘅行列。辣招之後又會令一班人意志堅定一啲，暫時打消買樓念頭。一年半載後，見樓市仲升，意志力又會崩潰，到時又撲出嚟買樓，市場又會話釋放積壓多時嘅購買力。
做莊唔輕易畀個價冧
幫襯發展商財務計劃，高槓桿買樓，唔係今時今日，你而家每個禮拜都睇到有蝕讓過案，全部唔係二手買番嚟，都係經一手發展商優惠購入，而家頂唔順要蝕讓。今天高槓桿買樓嘅，未來兩三年一定有人要蝕讓，而家嘅樓市淡友一定講中，畀佢預測到有人要為借到盡而損手。但係佢哋唔明，點解發展商有咁大嘅資產折讓？唔係因為貨尾太多，而係賺到嘅錢，派息派得少，睇住股價嚟派，令公司儲存嘅流動資金非常充裕。佢哋可以借，可以賣，可以賺，手上嘅銀紙只會愈嚟愈多。
結論係，一手發展商同二手業主富戶，一齊持貨頂住個樓市。你要全港六成冇按揭嘅業主賤價賣樓，又或者叫四成市民仲係辛辛苦苦供緊層樓嘅放棄一生所有，賣樓重頭嚟過，恐怕冇人會聽你講。發展商手上嘅貨唔憂賣，唔介意借錢畀你買，只要你肯孭條債就得。做莊嘅有咁強實力，唔輕易畀個價冧，因為佢手上不斷有貨，平賣唔止係賣嗰一間賺少咗，全部貨倉嘅貨都平晒。
同賽車場一樣，樓市係响一個極度操控嘅環境下進行，看似非常危險，但係好少發生致命意外。
