發展商提供高成數按揭畀買家，兩成首期就可以買樓，基本上只要你肯孭起條債，你就可以成為業主。呢啲情況係咪九七翻版？高成數按揭，樓市下跌好易變成負資產，仲唔推冧樓市？今年買新樓而選用發展商二按嘅業主的確係持貨能力最低嘅人，佢哋揸乾晒手上嘅現金，買一層自己負荷邊緣嘅樓，希望時間能夠站在佢哋嘅一邊，帶佢哋脫離負資產嘅邊緣，亦令供樓負擔按年減輕。佢哋唔係同發展商對賭，因為佢哋其實同發展商同坐一條船──如果樓市冧檔，你估發展商收番層銀主樓，仲可以賣到好價錢，仲可以追收差價？肯定係賺少咗，連同手上嘅存貨都冧晒價。對賭嘅真正對手，係香港嘅地運，賭佢向上。只要香港唔冧，就算幾年後自己撈唔掂，賣咗層樓都仲可以有番啲水腳。萬一香港地運玩完，唔只樓市，全部一齊玩完，大把人陪葬，又有乜嘢所謂？記住，香港只有樓市嘅資產係保證永遠值錢，唔會停牌變零，仲係唯一可以自用，除非你攞啲股票去貼牆紙。

唔夠錢供樓變成銀主盤，而家升市嘅時候都有出現，尤其是個別知名屋苑，幾乎間間都要蝕讓，唔係乜嘢秘密。但係呢類銀主盤並無推冧樓市，一來數量唔多，二來而家係賣家市場，唔會因為其他蝕讓盤而成為殺價藉口。但係發展商一手賣出嘅時候價錢mark得盡高，的確令到買家轉售時毫無水位。而家買一手樓，要有心理準備，3年後鬆綁賣得，未必可以賺錢走人。而家買樓，要有住一世嘅準備，又或者當自己買車，出售嘅時候輸折舊係理所當然。冇呢啲精神狀態，買樓好大壓力。

後悔60歲仍冇樓揸手

靠父幹可以30歲未夠就上車，倒不如話老豆搵個仔做人頭，幫自己買多層樓。你話啲父母太過照顧子女，竟然出首期讓個仔供樓？你試諗吓，如果唔出首期，個仔出去租屋住，簽落成身卡數，到頭來搞唔掂搵財仔，泥足深陷，最後又係邊個執手尾？咪又係個老豆。與其遲早搵財仔，倒不如一開始就搵財仔借錢買樓，等個仔交租嘅錢變成供樓，至少有一半係可以袋番落袋嘅樓價。你話點解咁後生就做樓奴俾層500呎（而家可能只有200呎）綁住自己？你唔明白，唔係咁多人識得欣賞同利用自由。年輕人浪費了身邊嘅自由而最後一事無成嘅，人數遠多於識得爭取自由為自己謀福利。耗盡了自由而發覺自己一事無成，感覺比當上20年樓奴更加悲慘。唔信？你覺得自己60歲嘅時候，會後悔一事無成多啲，還是冇層樓揸手多啲？應該係一事無成之餘，仲係一層樓都冇。聽落好似好無大志，唔諗啲驚天動地嘅功業，只係去諗點樣供滿層樓。但係你生存喺呢個時空嘅香港，見到林鄭恍似權傾朝野但係冇能力搵一個合心水嘅班子，讀咁多書只等待某日被人工智能取代，在自己出生嘅地方成為二等公民，你仲唔醒覺，原來供滿一層樓係你唯一嘅生活保障， 對唔住，冇人幫到你。