早前高價啟德投地嘅海航集團接受訪問，指高價地上面起嘅樓，唔一定要賣晒，部分會作為員工宿舍。
將來再有任何新地皮推出招標，我百分之一千肯定，港資地產商係唔會投到，除非係一啲偏遠細細幅嘅地皮，中資發展商覺得太細唔入流，入唔到法眼睇唔到，「散紙」而已冇興趣，港資先有機會成為地主。唔係港資保守或者計縮數，而係中資發展商計嘅數原來超越地皮本身。當港資發展商仲計緊每呎地價，加上建築成本同利息，將來要賣幾錢一呎先可以有錢賺時；另一邊廂，中資地產商計算呢件地皮工具，可以在市場集資幾多億，調幾多人落嚟香港，同埋如何分配內地同海外資產。人家買地唔係單純賣樓賺錢，你點夠人搶？
9.6萬伙潛在供應有水分
如果海航買地係用嚟做宿舍，政府成日講嘅供應量咪即係計錯數？96000個潛在供應量，計唔計海航買入嘅地皮？計的話，海航講明唔係攞嚟賣，係自用，咁供應量豈不是被高估？就算海航呢類自用盤係佔少數，但係未來中資起完嘅樓又會唔會不問價錢推出市場？港資地產商崇尚貨如輪轉，都尚有貨尾單位，擁有持貨能力。實力未算最強嘅恒隆地產（00101），上年年底出售浪澄灣貨尾單位，是持貨12年的貨尾。內地發展商賣樓每年可以過1000億， 香港賣區區幾十億樓，慢慢賣有乜問題？96000個潛在單位，當中大有水分，你要記住，你面對嘅唔係普通發展商，係中資發展商。
其實樓價狂升，唔單只香港媒體關注，連外國媒體亦有報道。外國媒體嘅報道，更加發人深省，對你認清而家嘅狀況有極大幫助，明天再講。
