「方帥，我好耐冇出場，最近你好似冇興趣股市，猛咁寫樓市，你識咩？」
「草蜢仔，你後生細仔梗係唔知，年紀有番咁上下嘅，又喺江湖打滾過嘅，就發現原來你讀書讀得幾多都好，個腦轉得有幾快，原來十幾年時間，你份身家都唔夠一個溝唔到女嘅可憐蟲，佢做過嘅只係有錢就買樓，一啲技術都冇。炒樓同買樓係兩回事，炒樓要快，買樓要定，後者最適合敦厚嘅人。你睇吓而家啲新聞，件件創新高嘅沽樓案例，升200幾倍，就係嗰啲30年前買落嘅自住物業。股票隨住年月可以灰飛煙滅，但好地地一層樓，除非打仗，否則係永久長存。」
「呢個買樓發達嘅遊戲唔存在喇喎，仲講買樓發達，你會唔會out咗啲呀方帥。」
「買樓唔會令你發達，但你發咗達就要買樓。能夠保持你購買力嘅方法，其實買少見少。地球上除咗土地之外，幾乎所有用嚟保持購買力嘅工具，都唔係限量供應，可以人為製造。」
「唔係掛方帥，唔通你可以煉金？」
「黃金更甚，全世界交易緊嘅黃金持倉，其實多過地球嘅黃金產量。所有黃金持倉人走去提金，即刻黃金擠提。你買咗金，夠唔夠膽話10年後一定貴過而家？其他就算係石油，而家已經有代替品，產油國都愈嚟愈窮。唯獨是土地，只要你買中供應有限嘅地方，保證你購買力唔會被毁滅。仲有，將來係機械人嘅世界，唔單止勞力唔需要你，腦力都用唔着你，你點都唔夠人工智能聰明。有乜嘢係機械人冇而你有？資源。未來人類要令自己有足夠資源在手，先可以讓自己有一定生活質素。過往靠聰明才智打天下，而家連基金經理都被炒魷魚，讓路畀人工智能上位。我覺得而家打本畀首期迫個仔買樓嘅老豆老母好聰明，好過打本畀佢哋做生意，至少輸極都有處地方踎。」
