有一段時間，風水師傅比任何大行分析員更有權威，他們話樓市升跌，大行分析員都唔敢駁，一般人更加唔會駁，不少人可以睇得明大行分析員講什麼，但冇辦法明白風水師傅的說話，既然唔明，又點敢駁。
今早去到茶餐廳，有客人話以後都唔帶風水師傅去睇樓，原因是較早前睇啱一層樓，價錢唔平，不過質素甚佳，於是帶埋一個風水師傅去睇樓，目標的是唱衰那個單位，希望業主可以減價，客人話就算唔減價都會買，風水師傅的工作好到加零一，不但講到業主心驚膽跳，就算連客人都要話考慮清楚，事情就這樣丟淡，業主亦沒有減價，最近客人發覺，那個單位早已售出，買家就是那位風水師傅。
老闆話客人在買樓之前點解唔問吓人，好唔好帶風水師傅去睇樓，一般業主都非常抗拒風水師傅，原因並不是師傅唱衰那個單位，而是師傅分分鐘兜篤將軍，返轉頭叫業主賣畀佢，或者佢有其他客人有興趣，久而久之，打算買樓的人就不會帶風水師傅去睇樓，除非打算唔買。
