林鄭在海南省叫大家有機會去下，食下海南雞飯，立刻被人笑到面黃，不少名士食家話，究竟林鄭知唔知海南省只有文昌雞，沒有海南雞飯，正如星架坡沒有星洲炒米。
今早去到茶餐廳，有客人問星架坡有沒有星洲炒米，老闆話當然冇，在星架坡食炒米已經是星洲炒米，唔使除褲放屁，仲要講星洲炒米，正如現在去國內或者星馬英美等地，有一些茶餐廳是標明是港式茶餐廳，在香港，相信大家未見過一間茶餐廳叫港式茶餐廳，客人話這是行業，與星洲炒米不同，老闆又話，大家在香港或者廣州珠三角地區，不時見到蘭州牛肉麵，在蘭州是沒有蘭州牛肉麵，只有－－牛肉麵，在海南沒有海南雞飯是正常，點解咁多人當做笑話講，不過話分兩頭，由於揚州炒飯太紅，現在煙花三月，去揚州正是時候，大家會發覺有不少食肆叫都揚州炒飯，我問老闆點解可以講得咁流利，老闆話這兩日講了十幾次，想唔流利都唔得。
