今早去到茶餐廳，有熟客在中美貿易戰之前買了新樓盤，但見勢頭唔對，最後選擇撻訂收場。雖然是5%，但已經唔見了50萬，那位熟客平時孤孤寒寒，突然損失了50萬，當然是鬼殺咁嘈。他認為地產商只可以殺訂1%，仲話有學者支持他的論調，仲叫我出文贊成。條友好似第一日識得我，咁嘅說話都可以講得出，我
從來唔會被人要求而寫，我想寫就寫。我話地產商殺訂5%已經是最低要求，如果只是殺訂1%，買樓的情緒更加高，準買家更容易做錯決定。他們會認為就算做錯決定也沒有甚麼大不了，最多只是損失1%，坊間就會睇到每一個樓盤都非常熱賣，樓市會更加熾熱。其實，政府如果要冷卻樓市，令買樓的人更加冷靜，應該落5%細訂時就要繳交不可以退回的應付印花稅，買樓的人要考慮在落訂之後如果放棄，就會有很大損失。買樓必定三思而後行，冷靜一下，對樓市也是健康。
如果要地產商只能殺訂1%就大件事，每一次買樓都要花很多財力物力，1%根本不能夠抵消成本，但這還不是最重要。地產商買樓要講時機，時機消逝就會一去不復返，有時候一個新樓盤只有一兩次買樓時機，殺訂5%已經是最基本要求，不能夠再低。事實上買樓咁大件事，唔係買菜，買樓的人一定要細心想清楚。其實，在突發的情況下，能夠損失5%而退出已經是不幸中大幸，不能夠再苛求。
