茶餐廳亂話（506）浪費資源的杯子蛋糕

　　今早去到茶餐廳，老闆話 long time no see。我在復活節假期後忙九彩，又趕稿，又要做講座，仲要晨咁早去電台做直播，真的是攞苦嚟辛。原來老闆有事搵我，佢老婆冇事搵事做，見到有茶客食剩蛋糕，於是買了一些細模具做杯子蛋糕，兩個份量等同於一個蛋糕，收費大約是1.5倍，認為那些細食的人會叫杯子蛋糕。橫掂都係食唔哂，慳番些少錢都好。在復活節假期後實施這個計劃，最初兩日反應都唔錯，但之後就乏人問津。主要原因是唔夠飽，一般客人都會叫番正常蛋糕，就算明之食剩都唔會叫杯子蛋糕。本來想替客人慳錢就變成自己浪費，老闆娘不明白，叫老闆問我點解會出現這個情況。

　　這個問題唔好問我，應該問地產商，尤其是那些建納米樓的地產商。他們本來以為將貨就價，納米樓的銷量應該很好，最後事與願違。有地產商在某個地盤，竟然有九成納米單位還未售出，主要是買樓的人發覺納米樓根本不夠兩個人住，所以倒不如唔買，寧願等機會買那些正常單位。在新樓空置稅追撃之下，地產商唯有減價促銷，買了納米樓的人就慘了。其實，納米樓根本是浪費資源。如果唔起納米樓而起小型單位，最低限度可以幫到一些買樓的人，就算買了納米樓的亦非常頭痛，就算未住都知道唔夠住，想賣走又沒有二手樓巿場，那些買納米樓作為上車踏腳石的變成欲速不達。