茶餐廳亂話（476）有今生，冇來季

　　今早去到茶餐廳，見到一個移居英國多年的老友在飲咖啡。原來他知道我替馬會寫波經，專程到來講一些英超消息俾我知。佢話同車路士領隊沙里老友，在車路士輸了比曼城6:0之後，沙里仍然未見過班主阿布，估計最多教埋今季，下一季一定冇得玩。我以為是什麼消息，原來是沙里將會被炒。在香港，稍為了解英超的人都知道沙里有今生，冇來季。現在不明白阿布點解仲未炒佢，如果被沙里繼續揸莊，輸多幾場，明年就冇得打歐聯。現在炒沙里，搵一個暫時領隊，仍然有機會爭贏曼聯同阿仙奴，唯一解釋是阿布並不是放棄沙里，而是放棄車路士。畢竟阿布玩英超都已經玩左咁多年，什麼錦標都贏過，係時候將車路士賣走，就算中國政府唔准民企再以高價買球會，但中東的油王更有錢，隨時可以用超高價買車路士。阿布玩了咁多年英超到最後仲賺一筆，應該算得上是名利雙收。

　　講到名利雙收，有時又唔係咁困難。十幾年前有一個大學同學到香港工作，他手上亦有一些積蓄，當時他打算租樓住，問我他手上的積蓄應如何投資。我話千祈唔好租樓住，最佳投資就是將手上積蓄用作首期去買樓，而且地點一定要靚，面積愈大愈好。講都冇人信，有博士學位，是投資專家的老同學竟然真的買樓自住，早兩年他已返回美國，在臨走之前將自住豪宅賣走，當然是大賺一筆。到現在我每年都收到他的新年禮物，他返回原居地後不時對人說，在香港買靚樓自住真的是名利雙收。咁嘅事，真係有今生，冇來世。