今早去到茶餐廳，有心水清茶客話上星期中原指數下跌0.57%，但指數公司負責人沒有出來解話，反而由傑哥話樓市在加息。中美貿易戰陰影下，第三季有機會下跌2至3%。問我點解唔係由昇哥講，是不是指數公司準備轉軚，所以叫昇哥消聲匿跡一段時間，待樓市有了一個方向才再出現。我話千祈唔好多心，在暑假期間，有
很多行政人員放假，樓市會比其他時間淡靜。昇哥只不過去了旅行，由傑哥講亦是合適。老實說，傑哥在前線多年，講樓市並不是單從兩個星期前的買賣成交，亦要有市場觸角。樓市以後走勢而作出分析，可信程度高很多，現在樓市升跌很難預料。新樓盤即使不提供高成數按揭亦錄得1,500個認購，超額三倍有多。在這個環境仍然預測樓市在第三季有2至3%跌幅，個人一定有獨到之處。至於傑哥點解會話樓市下跌，我認為他是見到「娥六招」的效應，不過沒有說出來，無謂同老闆唱對台戲。他的老闆曾經話「娥六招」無效，由此可見，傑哥是一個面面俱圓的人。
