茶餐廳日誌（243）人各有志

　　昨晚同香港羽毛球隊總教練打羽毛球，攰到不得了，本來今早唔去跑步，但為了不破壞每朝跑步恆心，勉強起床，天氣相當好，跑完之後感覺良好，好似冇咁攰，去到茶餐廳見到幾位物業代理高談闊論，當我飮緊咖啡的時候，有兩位物業代理坐埋我張枱，其中一位語重心長話我唔應該浪費時間寫文章，應該多關注市況，唔好唱淡
樓市，好似大鴻輝梁先生做得幾成功，去年福布斯排名21，今年有望升多幾級，我應該向他學習，那位物業代理說得極對，大鴻輝梁生目光遠大，是物業投資者學習對象，但他並沒有刻意唱好樓市，他只是做認為是對的事，我閒雲野鶴，寫文章講下投資地產心得，我雖然沒有大多數前輩咁犀利，但一定叻過很多人，我並沒有刻意唱淡，我只是提出有關的風險，而且我人微言輕，對樓市沒有影響，我只不過是自得其樂。

　　至於福布斯，昨日有報導大鴻輝梁生有273億資產，排名17，相當可喜可賀，但我們紀惠也不低，甚至比大鴻輝梁生還要高，物業代理話唔信，只是信口開河，我話信唔信都唔緊要，1月15日或者16日便會公布，代理話如果我們高過大鴻輝，他請飲茶，反之就由我請，我話不必，今年輸得太多，唔想明年初又輸，物業代理話我明知輸，梗係唔賭，我話當然，要在福布斯排名高過大鴻輝梁生，你估咁易。