茶餐廳日誌（237）炒樓王

 一個月Hibor 1.12679（創新高）

　　今早去到茶餐廳，老闆話有精於投資朋友介紹給我認識，我問未請教，那人話一般人都會叫佢做炒樓王，老闆唔知條友會這樣自稱，立刻話唔好意思，其實毋須唔好意思，條友在我面前自稱炒樓王，即是佢唔識炒樓，佢可以叫我做樓屎專家，但唔可以在我面前自稱炒樓王，誰不知條友唔識死，仲話很少見我投資物業，如果有需要，可以請教佢，我話當然當然，先多謝教練指導，小小地，早餐由我請，條友連多謝都唔講一聲就走了，大家都知道老闆是一個非常識做的人，又點會要我埋單，老實說，從來沒有一個人會在我面前自稱炒樓王，並不是冇人炒樓，而是冇人會自稱炒樓王，收租王就有一個。

　　其實條友不算太過份，有人在報章教人炒樓，被傳媒封他做炒樓王，如果不熟地產投資行業的人見到那段新聞，一定會覺得物業投資者的生活很艱苦，做到炒樓王都只不過是炒過幾個細單位，又要山長水遠去到湖南炒，他們不明白現在香港的物業投資者都非常低調，大家都唔會講炒樓，最多只會話儲到錢買樓收租，因為講炒樓是會刺激政府神經線，隨時會再出招壓樓市，所以，不是炒樓的人千祈唔好自稱炒樓王，當幫同業一個忙，政府如果再出招真的是很傷。