昨日要做財政預算案現場評述，晚上又有應酬，本來今早唔打算跑步，不過，自己認為咁辛苦才培養到早上跑步習慣，如果連續幾日唔跑，好習慣就會消失，於是起床，跑完步去到茶餐廳，聽到有熟客問老闆點解唔加價，老闆話自己舖，可以守得住，盡量唔加就唔加，熟客話好彩，如果租舖做生意，業主加租，茶餐廳唯有加價，好似最近有著名茶餐廳加價，不點名批評加價是因為加租引起，我認為那名熟客受到誤導，對業主有偏見，如果租舖做生
意，現在應該減價，因為租金下跌，減價是正常行為，現在還加價的並不是租客而是業主，熟客唔信，以為我偏幫業主。
有不少業主將自己物業與其他人合資做生意，而且他佔超過五成股份，他的合股人認為業主是股東，租金一定會相宜，最初的時候可能會係，但做落之後，業主見生意賺錢，就會加租，在加租之後就會加價，如果生意能夠保持，得益就是業主，如果生意減少，甚至要蝕本，受損失的就是生意合股人，業主有高租金彌補，所以與人合作做生意，千祈唔好貪大股東是業主，正因為他是業主，又是生意大股東才會加租，小股東不能夠反對，任由業主大股東宰割，最後連老本都賠上，老闆同那位熟客都表示明白，所以，大家千祈唔好將所有壞事都推到業主身上，搞到所有業主都是無良業主，其實，業主是提供一個平台俾人做生意，收返多少租亦是合理。
