今早在跑步期間，經過香港足球會酒吧，想起兩日前同樣時間坐滿鬼佬，歡呼聲震天，因為新英倫愛國者在「超級碗」決賽，在3：28大幅落後之下，反勝獵鷹，在美國新英倫，麻省住的大多數是英國移民，而在香港足球會睇波的大多數是英國人，他們捧愛國者亦是合理的。
跑完步去到茶餐廳，老闆話有鬼佬等我，咁奇怪，鬼佬係律師，佢與同事講「超級碗」，大家有一處不明
白地方，就是點解在最後兩分鐘，愛國者可以從20：28追到打和，應該沒有可能，因為超級碗計分方法，達陣6分，達陣再射入框框加1分，共有7分，獵鷹4次達陣兼全部射中框框，所以攞足28分，如果放棄達陣而射中框框，則可以得3分，所以，點樣計數都沒有可能從20分去到28分而令到雙方打和，佢律師樓同事話我乜都識，所以，在返工之前去茶餐廳搵我。
其實，我有同樣疑問，不過路在口邊，我為此問題問陸振球，佢俾咗條link我，明白晒，在以往，進攻的球隊到了第四次嘗試，如果在射程範圍之內，往往是選擇射框框，射中有3分，好過乜都冇，但現在的計分方法，如果唔射，繼續嘗試達陣，倘若成功，又有射中框框，是可以得8分，這很容易解釋點解愛國者可以從落後20：28追到平手，而令到獵鷹全隊人瞓唔著，鬼佬話明白晒，埋單走人。
