今日去到茶餐廳，太子仔搵我訴苦，話過年期間收到不少利是，用得比較手鬆，買了幾樣唔等使物件，又同朋友去吃飯，用咗大部分利是錢，點知道阿媽查數，認為佢唔識得理財，唔明白應使得使道理，佢阿媽仲話有特首候選人的理財哲學就是應使得使，所以一定沒有錯，太子仔問何謂應使得使，佢阿媽又答唔出，叫佢問我，將個波傳俾我，叫我點答，於是，我反其道而行話，茶餐廳唔想做我生意，叫我自己返屋企煮早餐。
老闆在遠處聽到，立刻走過來話絕無其事，我話是佢老婆弦外之音，我回家叫家務助理煮早餐，唔需要10元，現在要付35元，絕對不是應使得使，佢叫太子仔問我，即是叫我唔好幫襯，老闆兩父子不斷賠罪，其實，沒有應使得使這回事，應使得使即是唔好使，年輕人的理財觀念並不是應使得使，而是使得起，不會因為使費而欠下錢債或者人情債，理財觀念並不是儲蓄，而是認識金錢重要性，儲蓄是守財，不是理財，而所用的錢被稱之為消費，經濟繁榮是以消費為基礎，如果每一個人都應使得使，消費行業萎縮，城市沒落，有錢唔使的人好大罪，年輕人如果沒有使過籠，就已經是合格，做父母的千祈唔好太苛求，否則，或者會有反效果。
