上星期六，我對一位在醫院任職主任醫生話，由於福布斯榜的審核工作，對於我來說是壓力太大，導致左耳失聰，右耳亦只得五成功能，醫生立刻同我做了一個booking，叫我立刻去醫院檢查，耳科醫生見到我耳朵的情況，便說冇得醫，冇錢冇得醫，佢話，醫院還未引進最新的醫療儀器，在以往，最近都要去星架坡醫，所以佢話冇錢冇得醫，我立刻話唔得，我成日彈星架坡政府，導致星架坡銀行已經唔借錢俾我們，如果去星架坡醫，我恐怕入得唔出得，醫生話剛才他是說在以往，現在，香港中環有一個醫療中心引進了這款價值不菲儀器，他立刻替我做星期一早上booking，仲話今次唔收費，不過，立刻問我幾時可以買樓，於是，我好似做講座一樣，從頭講一次，雖然已經簡化，但仍然要用半小時，那位耳科醫生聽得津津有味，我當然開心，立刻搵同事送了一套書給他。
昨日早上，我去了那個醫療中心，那些護士認得我，可以一切從簡，直行直入，我坐在手術椅上，以為去了洗牙，醫生話我左耳發炎，右耳污垢太多，小問題而已，於是用好似洗牙工具，用超聲波將我的耳朵清潔乾淨，清潔的時候好似行雷一樣，很神奇，清潔完之後，我立刻聽得非常清楚，左耳滴三日消炎藥就可以，毋需覆診，盛惠1,690元，不過，就問我可不可以送一套書給他，當然可以，反正我的書也賣不出。
今早去到茶餐廳，老闆話我精神好好，是不是早兩日窒得個哈佛大學教授飛起，我話唔係，我耳朵舊患，俾個醫生用十五分鐘就搞掂，雖然絕不便宜，但是非常值得，正是病向錢中醫。
