今早去到茶餐廳，又有茶客請食早餐，唔使講，一定有嘢要問我，茶客話見到樓市大旺，有物業代理話樓市已經開到荼蘼，叫佢將自住單位賣走，等兩三年，有很大機會可以以賣出價七折買回差不多物業，況且，佢只得一個單位，賣走之後就變成冇樓人士，再買樓就毋需付足15%新印花稅，佢心大心細，況且物業代理俾一個好價，如果唔賣，就恐怕蘇州過後冇艇搭，但如果賣走，就要租樓住，除了不能夠享受低利息之外，變相替人供樓，如果唔賣，又恐怕失了機會，心大心細，所以希望我幫幫忙，老實說，以一個早餐就可以得到答案，對他來
說，的確是幾著數，不過，我又沒有蝕底，何況助人是快樂之本。
我望一望對方就話，如果他要賣樓是可以，因為對方只得三十歲左右，如果賣了樓，就算做錯決定，日後仍然可以再買樓，如果超過四十歲，就千祈唔好做這個危險動作，我問對方所擁有的物業是什麼類型單位，如果是高層，位置以及方向都不俗，就千祈唔好賣走，因為以後就很難有機會買到一個優質單位，如果是低層，方向位置均不佳的就可以趁高價賣走，樓價有上有落，有錢在手，一定有機會買回一個更優質單位，不過就要慢慢等。
對方話所擁有的單位不俗，但仍然想賣走，於是我話明白，不但可以賣樓，而且事不宜遲，他是因為經濟不佳而要賣樓，可能是欠下一筆巨債，或者每月供款是非常困難，既然如此，不如將物業賣走，落得輕鬆愉快，當然，是失掉了物業升值機會，但總好過生活在誠惶誠恐之中，那人明白，隨即返回坐位，將買賣合約簽妥，交到代理手中，代理立刻走人，順便埋了兩張枱的單。
