茶餐廳亂話（48）很簡單的做人道理

　　天寒地凍去跑步，別有一番滋味在心頭，去到茶餐廳，老闆正在教仔，問我意見，我話，我連自己的子女都未教得掂，唔夠膽教人，老闆話唔係喎，識得我的人都知道我的子女的確唔錯，點解我唔肯分享教子女心得，其實，這是錯覺，他們表現好是他們自己的事，與我的教導無關，他們進入社會，慢慢就會悟出一套做人道理，各人所領悟都不同，我只不過有時分享一些做人處事大道理，都是很簡單，不過，在執行時會有困難，其中一條就是報恩要快，報仇要慢。

　　在接受別人恩惠或者幫忙之後，最好以最快時間回敬，千祈唔好以為是必然的，欠人人情同欠人債務是沒有分別，所以，清還人情就好似清還債務，愈快愈好，如果被人得罪，就千祈唔好立刻回敬，否則，就會做成好似以前的粵語長片所說，冤冤相報何時了，就算想報仇，都會三思，慢慢再打算，時間耐咗，可能發覺當日別人的得罪行為，只不過是小事一件，根本唔值得介懷，甚至整件事忘記了，其實，立刻報仇是犯上了不君子行為，好似一名控波球員被對手以超技術侵犯，球證會給予一個罰球，但被侵犯的球員立刻回敬，他有很大機會得一面黃牌，這個做人道理雖然很簡單，其實，要明白都不是太容易，莫講實行。