在去年十二月中，有一次在茶餐廳食早餐，有茶客叫伙計買股票，最好是買藍籌股，佢話，聖誕鐘，買匯豐，茶客走了之後，伙計立刻問我，他們唔知道我有包拗頸性格，猶太人叫做第十個人理論，毛澤東話，凡是敵人贊成的，我們必須反對，於是我話，條友錯到離譜，現在是聖誕鐘，賣匯豐，其實，我所指的並不是匯豐，而是超級藍籌股，今非昔比，匯豐已經不是超級藍籌。
伙計半信半疑，我話，在這間茶餐廳，隨時都見到一些國內富豪，他們一定有買香港股票，每一個年尾，他
們都要出售部分股票，用作清還國內銀行貸款，他們都會選擇比較容易賣出的超級藍籌股，所以，年尾前，不少超級藍籌股會有沽售壓力，股價大多數會下跌，如果要買股票，等到最後一個交易日，或者可以執平貨，在十二月中就不宜買超級藍籌，如果夠膽而又有股票在手，不如博一鋪，將部分藍籌股票沽走，到一月初再購回，可能會有一成利潤，所以，現在應該是聖誕鐘，賣匯豐。
今日食完早餐，伙計話已經有人埋咗單，那人在去年十二月中聽到我話聖誕鐘，賣匯豐，本來他是想買，立刻改變主意，賣走了一些超級藍籌股，賺了不少錢，仲話，如果我賞面的話，今年早餐由佢埋單，那位茶客的確有風度，不過，他並不了解我的性格，我三歲就已經爭埋單，如果佢請我食一年早餐，即是叫我唔好去那間茶餐廳。
