今早去到茶餐廳，老闆非常風騷，每一位入去客人都免費送上一杯咖啡或茶，我問伙計，老闆昨晚是不是中了六合彩，伙計話唔係，其實，老闆昨日很心煩，因為有人話嚟收陀地，我有少少奇怪，由茶餐廳行去警局，都唔需要五分鐘，點會有人收陀地，況且，現在已經冇人收陀地，社團人士都做正行生意，或者，會有一些人利用某一個社團名字為自己謀取利益，我相信到嚟收陀地的人都唔見得光，只會用代號代替。
老闆同我講，昨日下午，有六個男性人士到來，兩個老人，四個小孩，話要收陀地，其中一個老人自稱426，指住另外一個老人話438，其他四個小孩是49，老闆問我知唔知點解，我話438在一個社團內負責文職，426負責行動，至於49是預備組，未入職，老闆早有準備，只叫精壯伙計返工，又一早報警，佢話驚都未驚過。
他們幾個人坐低之後，二話不說就問老闆有沒有人照，是什麼社團，那人在社團的職位以及代號是什麼，老闆胸有成竹話，照他的是香港最大社團，職位老頂，代號689，班友正式冇膽匪類，一聽到是689，立刻走夾唔抖，不過，臨行執番揸沙話佢哋7月1日再嚟，689都照唔住，誰不知他們剛剛講完，幾個差人立刻現身，叫兩位老人家及四個小孩請移玉步，到警局問話，估唔到其中一個小孩喊左出嚟，攪到差人要出言安慰，同小孩講，只是問下話，唔使驚，真羞家，好似三個在台灣偷海產的港女咁羞家。
