有大廚話鹵了一打鮑魚，足一斤重，送俾我夜晚寫稿時作為零食，約我在茶餐廳飲杯咖啡，我知道大廚一定
有問題問我，甚至，我知道佢問我什麼問題，那位大廚功力，在香港中餐行業，絕對是前五位，但是他有一件憾事，就是從未得過米芝蓮星，最初的時候我同佢講一些鼓勵說話，話佢一係唔攞，一攞就會係三星，大廚當然是非常開心，不過，年年都攞唔到，開心都變咗唔開心，於是，我的說話由鼓勵變成安慰，命裡有時終雖有，命裡無時莫強求，大廚暗然銷魂，今次搵我，九成九問怎樣攞米芝蓮星。
大家坐低之後，我先問大廚有沒有興趣攞米芝蓮星，大廚話有，但沒有錢打通關係，最多可以攞二百萬出來，我話要用錢，不過，不是用來打通關係，我再話，以我能力，只可以幫佢攞到米芝蓮一星，二三星我就冇計，我再問大廚是否知道米芝蓮一二三星定義，廚藝當然是首先要考慮條件，大廚話唔知，我話很簡單，三星是值得專程前往，二星是值得繞道前往，一星是值得順道前往，所以，要奪取一星，餐廳位置一定要在有人流地方，此是廚藝之外首要條件。
我對大廚話，既然佢已經準備二百萬，就不如用這筆錢開一間小店，坐位不多於二十，只供應幾樣拿手菜，例如蛇羹，小乳鴿，糯米飯，倫教白糖糕等，一定要真材實料，但價錢是街坊價，香港人很多都是食家，再加上大廚打正旗號，三個月內，我保證客似雲來，米芝蓮星探收到消息，試過，明年小店就會上榜，大廚非常雀躍，話如果可以攞到米芝蓮星，送一晚給我，菜色任我訂，我話，不如將一晚營業額捐去一間慈善機構，大廚話捐夠兩晚，所以話，仗義每多屠狗輩是沒有錯。
