有年輕朋友在幾年前買了樓，現在見樓市大旺，心思思想將物業賣走，等兩三年再慢慢揀一層合心水物業，但又唔想俾老婆知道，物業代理同佢講買家可以買入之後再租回給他，佢老婆是唔會知道，而且租金相當優惠，我話千祈唔好，沒有人可以睇通樓市，試問有幾多個人可以睇到樓市在第三季狂升，如果他售後租回，樓價不跌，租約到期之後被買家收回，都唔知點樣同老婆交待，得一個自住物業，賣走即是賭身家。
在2003年沙士之後樓市低迷，銀行對樓宇按揭的條件是相當寬鬆，不少年輕人亦藉此機會置業，在2009年，曾特首因為樓價飆升而出招，並且揚言出招後樓價必定會下跌三成，不少年輕業主持有物業不足五年，升幅是他們已付首期兩三倍，不但不相信樓價會繼續上升，反而相信辣招可以將樓價壓下去，毅然將自住單位出售，然後售後租回，在兩三年後樓市跌定，再考慮再買樓，他們的「售後租回」變成一個錯誤的決定，不少曾經是業主的人至今仍然要租樓住，所以，年輕朋友同我講「售後租回」，我會咁大反應。
