唔經唔覺，市建賣「煥然壹居」接近兩個月，又唔經唔覺就嚟賣晒，三百幾個單位賣剩四十幾個，陸續仲有人揀樓，而且去貨甚快，估計全數沽清並不是問題，今次我跌眼鏡，當初，我認為若果「煥然壹居」唔減價，全數沽清將會是一個不能完成的任務，因為「煥然壹居」是在去年底以同區新樓八折訂價，到現在樓價下跌了大約10%，變成只得一成折讓，而且樓市正在下跌，經濟轉壞，政府又唔肯減辣，賣唔晒又唔出奇，就算市建都沒有把握，否則，就唔會要求政府俾「煥然壹居」減價，連發展項目的市建都沒有信心，我沒有信心亦是人之常情。

　　兵法有云：哀兵必勝，市建判輸嚟打，負責賣樓的人多走一步，熱心一些，咀甜舌滑一些，賣晒又絕不出奇，當「煥然壹居」賣晒之後，市建千祈唔好以為可以領功，有官員會話，一早知道可以賣晒，所以唔批准減價，市建諸公今次一定呻笨，都未試過，點知唔得，如果沒有講過要求減價就最好，今次，可以領全功。

　　今次「煥然壹居」成功，反映市場一個實況，如果有兩成折讓，去貨是沒有問題。不過，市建慶功的時候，房委各委員就會感覺到壓力，居屋售價雖然有三成折讓，但訂價由去年九月計算，折實只比「煥然壹居」平幾個百分點，房委各委員今次真的很頭痕，減價是沒有可能，今次，真的是考輝哥功力。