樓巿專家（包括在下）應該去食屎

　　有屯門師奶的兒子在兩個月前以330萬買了一個單位，在耀母揚威之後，還未入伙，樓價已經下跌至290萬，兩個人已經兩肚火，有記者仲唔識死，走去問師奶有何感受，今次大鑊，師奶立刻大發雷霆，叫那些自稱樓市專家的人去食屎，成日響度唱淡樓市，買樓自住，業主又唔肯平，冇計，貴多少都要買，師奶講得冇錯，不過，她應該平心靜氣想一想，如果不是有一班食屎樓市專家，她可能要400萬才可以買到那個物業，而非330萬，她應該多謝，而非叫樓市專家食屎。

　　不過，樓市專家又的確應該食屎，應該在師奶入貨之後就立刻唱好，樓價回升，才真的是耀母揚威，現在無端端唔見咗40萬，最唔抵就是有其他雀友師奶個仔現在買樓，有意無意之間講兩句，阿乜師奶，點解咁失策，唔聽那班樓市專家講，聽大摩講，似乎早了一點買樓，貴咗十幾個%，不過，唔緊要啦，用來自住，又唔係炒，慢慢就會回升，有買貴冇買錯，阿乜師奶已經怒火中燒，仲要俾雀友窒，於是大聲話，班樓市專家，食屎啦。

　　其實，阿乜師奶如果要鬧，就應該鬧CY，特首公開表明要將700萬樓壓至600萬，跌幅14%，而今次阿乜師奶層樓由330萬跌至290萬，跌幅12%，未達到特首要求，如果由樂觀的人來看，其實是有賺，其實，邊度有樓市專家，不少所謂專家都是租樓住，在過去幾年，相信專家的人真係食屎。