昨日，我講我在小學讀書時，老師叫我解讀「燕詩」，我話燕子做得對，被老師們扚入教務處公審，一人一把咀，五個老師交叉感染，十把咀都唔止，講到我犯了彌天大罪，不但罰我寫悔過書，更加要罰抄白居易「慈嗚夜啼」一百篇，叫我用心領會，話個隻烏鴉的母親死掉之後，夜夜夜半啼，聞者為沾襟，叫我反醒一下，當時，我知道烏鴉根本不是喊，而是烏鴉叫聲好似喊一樣，如果大家唔信，去馬來西亞檳城走一轉就知道我所言非虛，白居易當然未去過檳城，所以，佢更加唔知道，不過，一定不能和老師們拗，除非想自討苦吃，但我不經意爆了一句話，令到我的國文科得負分，有人認為我最少都是零分，何來負分，他一定沒有睇歐洲國家盃分組賽，克羅地亞在比賽時，球迷發生騷亂，被歐洲足協判罰三分，如果克羅地亞未能在其他賽事取得三分，她便會是負分。

　　其實，我得負分是咎由自取，我見老師們以大欺小，以眾凌寡，仲用到白居易，我就對老師們說，若果烏鴉真的是有孝心，在阿媽在生時就要對它們好一些，餵食多一些，毋需在阿媽死咗之後，夜夜夜半啼，令人誤會烏鴉是非常孝心，白居易仲俾個好名字，叫「慈烏」，既然如此，何不學歐陽修，佢話「清明豐，不如生前薄」，此語一出，我都認為自己得負分是應該的，老師們聽到仲唔如狼似虎，差不多要踢我出校，不過，大家又毋需擔心，辦學同做生意都是一樣，沒有永遠的敵人，今年，學校又俾我一個最佳校友獎，雖然事隔五十年，總好過我死咗才俾，甚至俾個更大的獎，他們終於明白，生前豐，不如清明薄。其實，氹老豆，老母就最容易，今個星期一於一早霸位飲茶，他們便會很開心，不過，做子女首先要做一件事，就是預先聲明，只是飲茶，別無所求，不是借錢，不是買樓，更加不是分身家，他們的父母聽到之後，便會很開心，他們會對週圍的人講，他們的子女非常有孝心。