買樓一定要了解對手

　　有一對年青夫婦在幾年前買樓，到最近賣樓，竟然還要蝕多少，他們條氣好唔順，問我點解會咁樣，答案好簡單，買得貴，雖然那個是方向甚佳的高層單位，但這並非他買得貴理由，而是當日那個業主根本唔想賣樓，但他們兩夫婦好鍾意，銀行又容易借錢，不知不覺比市價多付了三、四成，但他們唔覺，因為首期只多付了些少，現在賣樓要蝕，都不能夠怪別人，連運滯都唔可以講，而是他們當時唔了解對手，如果那個賣家是等錢用，就唔需要用咁多錢買樓，其實，樓宇買賣交易，除非買的是能產生協同效應的物業，例如相連單位，否則，主動權應該是在買家手中，買家俾溢價，即是放棄主動權，買貴樓就唔能夠怪別人。
 
　　買樓一定要睇賣家的態度，如果那個單位是賣家的自住單位，甚至唯一個單位，在無財政壓力之下，要那人出讓一定要付出相當大溢價，近日出現那麼多創新高價就是這個道理，那些業主沒有財政壓力，樓價非創新高不賣，就算樓價再上升，那些新買家獲利都不會太多，不幸回調，他們就損失慘重，所以，現在以高價買樓為未來投資失利埋下伏筆。
 
　　買樓一定要壓價，否則業主就會認為開錯價，隨時會反價，而且反價的幅度會很大，甚至反完又反，買樓的人就很唔開心，所以，就算非常鍾意那個單位，買家循例都要減多少，業主見買家還未俾到價，就沒有機會反價，最多是維持叫價，最近有用創新高買樓的人向我呻，話佢買樓時，那個業主要幾多俾幾多，點知個業主反價，再反價，搞到佢最後要以創新高才可以買到那個物業，買得唔開心，就是這個道理。所以，要買樓，一定要搵一些心急賣樓的人，唔好話有著數，起碼唔會俾人反價，就會開心好多。