去賭場賭錢，輸錢是正常，但有四種人就算他們未賭，都已經知道是輸多贏少，昨天講了排行第四的孤寒注，今日講排第三的騎劉皇馬，當然唔會係劉皇發隻馬，而是劉備隻馬，叫「的盧」，曾經救過劉備，其實是一隻不利主人的馬，只有劉備騎才冇事，其他人騎就凶多吉少。
而現代騎劉皇馬的解法就是一個人挪用公款去博一鋪，當然那人是信心十足，誰不知這是贏一輸二，必輸的遊戲。我小時候，家裡請帳房，家母一定會問，如果收到數，會不會走去賭場博一鋪，全部都話唔會，但全部都唔請，直至有一個話，一定唔會，除了有超過一半機會輸錢外，更加會失去工作，贏不到一，輸超過二，點解要去博。
上星期中港股市大跌，理論上唔會即時影響樓市，但竟然有買了樓的人撻訂，有老友問我，那些買樓的人應該早已準備應付款項，就算股市大跌，他們都唔需要撻訂，而且，連那些以市價七折買新居屋的人都會撻訂，令他百思不得其解。
我對老友說，那些人犯了賭場上大忌，在必輸排名榜排第三的騎劉皇馬，將準備買樓的錢，在未成交前走去股票市場搏一搏，老友唔同意，佢話那些錢是他們自己，怎麼可以說是騎劉皇馬。老友唔明白，當簽訂買賣合約後，那些準備買樓的款項已經唔屬於買家，那些錢只不過在等待成交日，由買家轉至業主手中，業主亦一樣，他已賣的物業當然不能夠再賣，連租都唔可以，所以，買家將準備成交金錢，走到股市搏一搏，其實是盜用業主的錢，這不是騎劉皇馬，又是什麼。
股票買賣，當然有贏有輸，贏，當然可以為買家贏一些零用錢，就算輸，他本來都可以應付，但今次股市跌得太快太急，他們所準備的款項，已經唔見了一大截，冇能力成交，所以，他們除了要撻訂外，更加輸了股票，正正式式的贏一輸二，騎劉皇馬的最佳例子。
