雲高爾以高姿態入主曼聯，立刻帶隊去美國作熱身賽，不過，他又表示去美國打熱身賽是浪費時間，言下之意，美國足球水準未夠班，就算對手是洛杉磯銀河，在美國職業聯賽贏到開晒巷，而今屆世界杯，美國在分組賽出線，而英國就出局，所以，有很多球評家說雲高爾太寸，反而希望銀河給予他一個教訓，我覺得有料之人，寸又何妨，現今社會，如果謙虛，反而會被人話冇料，最緊要就是贏波，如果曼聯大比數贏，就多多都寸得起。
雲高爾雖然講得甚寸，但其實他是有D驚，他知道以現時曼聯實力，還未能夠與西班牙雙雄，拜仁慕尼黑一較高下，不過，曼聯今屆冇得打歐聯，雲高爾可以慢慢執番好隊波，當務之急，當然是怎樣大數洛杉磯銀河，於是，雲哥爾又打電話給我，問一問我排陣意見，老實說，我同佢唔係好熟，不過，整個世界足球壇都知道我在世界杯開鑼前，獨孤一注買德國贏波，全世界都是跟紅頂白，唔問我又問邊個。
我收到雲高爾電話後說：雲兄，原來你唔知道熱身賽意義，熱身賽並不理會對手，而是打出己隊部署，如果講排陣，你一定叻過我好多，我幫你唔到。其實，當時我在搞一個小型聚會，搞賓客名單，排位等已經搞到我個心七上八落，點知道雲高爾死追問，我唯有答，能夠做到進攻的時候有七個人，防守時有八個，就一定可以贏波，我隨口噏，但雲高爾又做到，並且以該陣大數洛杉磯銀河7比1，雲高爾所排的陣叫3-5-2，真的是進攻時有七個人，防守時有八個，其實，雲高爾並不知道，我講的並不是足球戰術，而是物業投資策略，現在香港的物業投資者都坐擁大量現金，好似有五個中場球員，遇上有優質物業，可以很快做出決定，甚至不需要銀行貸款也可以將物業買下來，但遇上經濟環境轉壞，又有足夠資金抵禦銀行追收差額，基本上已經立於不敗之地。雲高爾靈活運用，首仗雖然大勝，但次仗的對手羅馬防守力甚強，今次要贏波，一定要靠一個「等」字，我敢說，與投資物業一樣，入波的機會一定有，只是是否能夠把握得到而已。
