講咗幾篇無關重要巴西文化，有老友不耐煩，打電話給我問幾時可以真正寫波經，邊隊最有機會攞冠軍，還有兩日世界杯開鑼，現在正經一點寫波經亦係時候，邊隊可以攞冠軍先唔講住，我心目中有六隊，很有把握入8強，分別南美洲的巴西、阿根廷與及歐洲的西班牙、德國、意大利、荷蘭，但我又相信，冠軍將會落在歐洲球隊，無它，雙拳難敵四手。
 
　　如果大家睇這六隊球隊陣容，絕大多數球員在各地，尤其是歐洲的超級球會搵食，而且是打正選位置，反觀其他球隊，以英格蘭為例，隊員不一定是超級球會正選，而且有個別球員在一般地區性球隊效力，雖然都是打英超、西甲，但亦有很大分別。而巴西、阿根廷雖然有世界頂級球員在陣，但個別位置的球員可能未夠質素，我相信對方教練會作出針對性部署，巴西入四強應該沒有問題，入決賽就有難度，阿根廷可能連四強也入不了。
 
　　今次歐洲球隊的確比南美洲及世界各國家賽優勝，我唔知道走位圖表，但我相信西班牙、德國最有機會入四強，在八強中我只講了六強，另外兩強將不離墨西哥、葡萄牙、法國、俄羅斯，而我希望有一隊亞洲，一隊非洲入圍就好了。
 
　　講香港地產，大家可能會發覺香港土地招標出現一個很奇怪現象，大型土地只得幾間大地產商落標，成交價又會低於市場預期下限，小型土地則參與落標的地產商，甚至個別投資者都很多，成交價都往往高於市場預測上限，有人不明白，其實很簡單，雙拳難敵四手，大型土地由於沒有小型地產商競投，大地產商出價都會保守一些，小型土地又不同，多了一些中、小型地產商參與，他們出價進取，往往能夠壓過大地產商。所以，小型土地差不多清一色由中、小型地產商奪得，政府亦很明白這個道理，所以，現屆政府推出土地以中、小型土地為主，上屆政府則集中推出大型土地，最後做成供應失衡，樓價飆升主因，希望大家明瞭，樓價上升並且由炒家所引致。