巴西教練史高拉利打電話俾我問﹕如何部署？我立刻傻咗，因為我冇想過史高拉利會打電話給我，更加會問我揭幕戰如何部署，於是我答：唔識。阿史話﹕唔係問你足球，而係問，若果巴西取得世界杯，我將會有一大筆獎金，我想買樓，如何部署？咁都冇咁驚，問我買樓，簡單一句，第一層樓，量力而為；第二層樓，量力而不為，不過，這樣深奧的解釋，我唔知道葡萄牙話點講，於是一聲Boa noite，之後便收線，馬啓仁去到巴西，收工的時候同其他記者講句Boa noite就包冇撞板，講晚安點會撞板。
我幻想，如果我係巴西教練，揭幕戰應該怎樣部署，同組克羅地亞排18，墨西哥20，喀麥隆56，應該揀克羅地亞，就算輸，打墨西哥及喀麥隆的時候博到盡仍然可以出線。如果是克羅地亞，就會揀墨西哥，如果是墨西哥，就會揀喀麥隆，如果是喀麥隆，就會揀墨西哥。我相信一般合格教練都會作出如此部署，當然，俾摩連奴做教練，他或者會有驚人部署。
阿史問我買樓，我睬佢都傻，佢女朋友多，樓更多，佢唔使我教。不過，一般香港人初次置業，我多口說兩句，我說的量力而為並不是初次置業的人可以有能力買一個2,000萬物業，走去買一個500萬，這樣做會浪費他的資源與及丁權，而我說的能力是包括首期及以後的供款，他應該買一個1,500萬物業，若果有能力買1,000萬，就買800萬，600萬就買500萬，如此類推，不但可用盡他的資源，但又不會浪費他的丁權，更有備無患，而且首置的人仕與主辦國的揭幕戰很相似，首置可以揀樓而主辦國可以揀對手，因為主動權在他們手中，不要睇少主動權，其實，這是致勝之道。
