茶餐廳手記（#897）點解咁少西方領導人出席中國閱兵

　　今日早上去到茶餐廳，有客人話頂住條氣，星期六與以往一樣，在開學前宴請兒子同學家長食晚飯，但竟然有一半家長冇到，以前全部到齊，大家仲講吓子女經，今次有咁多家長唔到，都唔知乜嘢原因。

　　老闆話，唔使問阿貴，一定是客人兒子今次的成績非常理想，以往則在平均線之下，出席的家長可以耀武揚威，所以踴躍參加，今次考得好，其他家長就冇興趣出席，客人話全中，他兒子的成績由平均之下大躍進至全班第二名，問老闆點解可以估到。

　　老闆話唔係估到，而係以事論事，以往中國未成為軍事強國的時候，如果有閱兵，西方國家一定踴躍參加，甚至以勝利者姿態參加，西方傳媒一定指指點點，話中國的武器落後，最少要多二三十年才可以追到今日西方，到了今日，在武器方面，中美已經不相伯仲，英法意已經大幅落後，試問那些歐美國家又點會參觀中國閱兵，法國佬見到殲二十都唔知點表態，十幾年前殲十外銷版已經打到法國頂級戰機陣風一仆一碌，唔嚟中國參觀閱兵就是最好決定。

　　請客其實是俾面派對，今次你請我嚟，下次我請你嚟，如果西方國家唔參觀中國閱兵，到西方國家有求，中國又未必會應允，閱兵好似擺喜酒，大家俾面，派對以後可以繼續，不過，唔嚟都唔緊要，千祈唔好派艦隊到南海耀母揚威，咁樣做就係唔畀面派對。