茶餐廳手記（#876）茶餐廳點解開張兩日後執笠

　　今日早上去到茶餐廳，有客人問老闆，最近有一間茶餐廳開張兩日就執笠，既然可以開張，最低限度都要好似香蕉煎餅，捱兩個月才執笠，究竟有冇大家都唔知的原因。

　　老闆話，如果茶餐廳只是幾個拍檔經營，當然唔會立刻執笠，估計茶餐廳是股份制，股東是國內人，夾幾十萬就可以在香港做老闆，幾咁開心，股東持有的股份，大有可能已經超出一倍甚至幾倍，搞手不但自己不用出錢，而且可以隨時收割，只要茶餐廳執笠，所有股東的投資都會落入搞手手中，千祈唔好以為那些股東有怨言，只要搞手同他們講，如果要茶餐廳繼續經營下去，就一定要再夾錢，他們寧願退出都唔會夾錢，不過，今次只是開張兩日，似乎搞手太過心急，見到已經收咗咁多錢，早日埋單計數，那些投資茶餐廳的人當買一個教訓。

　　除了茶餐廳之外，酒樓亦會出現類似情況，最近有幾間酒樓結業，相信很快就會以另一名字在原址重開，原因是那些酒樓不會是獨資經營，而且由一個搞手集合了一班股東投資，結業的酒樓孭了一筆為數不菲的債務，股東亦唔打算再投資，搞手唯有將酒樓結束，待搞清一切債務問題之後，搞手就會搵過另一班股東投資，由於基本設施已經齊全，搞手不用投放太多錢，新股東可以用較少資金入股一間酒樓，很多時搞手反而希望酒樓執笠，否則就搵唔到食，這個世界就是這樣的，投資一個唔了解行業，又不能親力親為，可能蝕到渣都冇。