茶餐廳手記（#858）樓價跌，但點解賣了的樓是買唔返

　　今日早上去到茶餐廳，有客人話昨日同朋友去睇樓，有一個奇怪現象，就是朋友一年前賣走的住宅單位，在樓價指數下跌，劈價蝕讓聲中，今日業主叫價比當日賣出價還要高，而且同類型單位大多數平均呎價都高於當日呎價，朋友非常失望，帶大家去睇樓，以為可以用低價執平貨，在大家面前威一威，最後仲俾代理窒，話那些劈價蝕讓有不少是銀主盤，如果唔係移民，賣樓的業主唔係咁多，仲叫客人朋友快啲買樓，有咁多國內人來港情況下，供需已經失衡，只是樓市的庫存或者潛在供應量仍然很多，令到樓價不能上升，但仍然沒有下跌，在供應不斷減少而需求增加下，唔使係專家都知道樓市日後走勢。

　　老闆話，傳媒知道樓市已經轉勢，仍然報道樓價下跌三成已經沒有吸引力，而事實上樓價指數下跌超過三成，如果不是有一些蝕足四、五成個案，根本不值得報道，近日，已經有報紙在不顯眼位置報道一些賺錢摸貨成交，那些摸貨雖然利潤不高，很少超過一成，不過，摸貨出現，代表樓市已經築底，再大跌的機會不大，傳媒亦是春江鴨，但很難以今天的我打倒昨天的我，所以，報道並不顯著。

　　有客人話在兩年幾前賣走一個住宅單位，雖然樓價下跌兩成，但今日用當日售價竟然買唔返，唔通樓價冇下跌，老闆話，樓價是有下跌，不過，客人當日並不是在最高價賣走，到今日又不能用最低價買返，當中差額可能高達兩成，所以，冇必要唔好賣走物業，尤其是自住單位，就算樓價下跌都很難買得返。