茶餐廳手記（#857）樓市睇什麼

　　今日早上去到茶餐廳，有客人話真係唔識睇樓市，中原指數連續升了四個星期，雖然唔夠1%，但如果唔睇指數，在傳媒不斷報道低價成交，以及有評論員話樓市有無底黑洞，一定會以為樓市下跌到不亦樂乎，絕對唔會諗到樓市上升，究竟樓市應該從那個角度來看，很快就知道升跌。

　　老闆話，如果任何人入嚟茶餐廳，見到坐滿晒人，甚至要等位，一定唔會同人講茶餐廳生意很差，反之入到茶餐廳，見到只得幾枱客，就算老闆話生意很好都冇人信，樓市也是一樣，簡單來說，樓市睇人口，如果香港人口增加，尤其是優質人口，話樓市跌都冇人信，反之，好似在疫情時候，走了幾十萬中產，而且當中有不少是賣樓離開，講樓市升都冇人信，而事實上樓市下跌超過三成是不爭的事實，所以，睇樓市，最簡單方法就是睇人口增減，人口增加，樓市一定會上升，反之如果人口減少，樓市一定會下跌，雖然未必會即時反映出來，但只會遲，唔會唔反映。

　　由於香港突然走了三、五十萬中產，香港政府不得不放寬優才專才移居香港，但與此同時，以BNO去英國的香港人，有部分水土不服要回流香港，所以，在未來一段時間，香港人口增長有機會遭受由國內移居香港的優才專才，以及由英國回流的香港人夾擊，人口增長會很快，雖然有人話嚟香港不一定要買樓，樓價唔會上升，而事實上國內人想法，如果唔打算買樓，就唔會嚟香港，唔夠實力就冇辦法，至於由英國回流的香港人，就算唔買都要租樓，租金上升亦會帶動樓價上升，這就是近日樓市唱極都唔跌的原因。