茶餐廳手記（#822）香港點解唔可以有多三間醫學院

　　今日早上去到茶餐廳，有客人問我知唔知邊個係浸大校友會會長，現在浸大申請醫學院，校友會有冇出謀獻策，我覺得客人早已知道我是浸大校友會會長，否則唔會咁問，至於有冇出謀獻策，浸大校友會與其他大學校友會有所不同，我們對於大學行政只是關注而不干預，申請醫學院咁大件事，由校長帶領專業團隊去做，校友會出謀獻策只會幫倒忙。

　　老闆問有幾多間大學申請，我話有三間，科大，理大，浸大，老闆話浸大很大機會，較早前科大頒了一個榮譽博士俾黃仁勳，在致謝詞時，黃仁勳話，科大可以做中國MIT，唔講大家未必知道，MIT是沒有醫學院，理大情況也差不多，所以，浸大是有機會，不過，這都是我一廂情願想法。

　　老闆話，現在是否講緊醫學院而非醫院，當然唔可以突然多三間醫院出嚟，但點解香港唔可以多三間醫學院，理論上唔會有抵觸，好似生物化學系，所有大學有生物化學系都唔會有問題，而三間醫學院的收生，除了香港人之外，國內人應該佔大比數，令到國內有心讀醫的學生有一個好地方。

　　國內人與香港人有多少不同，香港最優質的學生有大部分讀醫，而國內最優質的學生讀科硏，次優質的學生讀金融，第三級的學生才讀醫，所以，無論在師資以及醫療設備未必達到一流水準，所以，香港如果有多幾間醫學院，可以吸納國內尖子來港讀醫，畢業後回國推動國內醫療服務進階到另一境界，香港是否連開三間醫學院，並非睇申辦的大學是否夠水準，而且政府官員夠唔夠膽。